వంకాయ పచ్చి పులుసు
వంకాయ పచ్చి పులుసు .
కావలసినవి .
లేత నీలం లేదా తెలుపు రంగు గుండ్రని వంకాయలు -- మూడు .
ఉల్లిపాయలు -- రెండు
పచ్చి మిరపకాయలు -- అయిదు
చింతపండు -- నిమ్మ కాయంత.
కరివేపాకు -- రెండు రెమ్మలు
కొత్తిమీర -- ఒక చిన్న కట్ట
ఉప్పు -- తగినంత
పసుపు -- కొద్దిగా
పోపునకు .
నూనె -- మూడు స్పూన్లు
ఎండు మిరపకాయలు -- 4
మినపప్పు -- స్పూను
జీలకర్ర - పావు స్పూను
ఆవాలు -- అర స్పూను.
ఇంగువ -- తగినంత .
తయారీ విధానము .
ముందుగా చింతపండు విడదీసి ఒక గ్లాసు నీళ్ళలో పదిహేను నిముషాలు పాటు నానబెట్టి తర్వాత ఒక గ్లాసున్నర రసం పల్చగా తీసుకోవాలి .
వంకాయలు పుచ్చులు లేకుండా చూసుకుని కాయ అంతా నూనె రాసి స్టౌ మీద పెట్టుకుని సన్నని సెగలో కాల్చుకోవాలి .
తర్వాత నీళ్ళతో తడి చేసుకుని కాయలపై పొట్టు మరియు పై తొడిమలు తీసేసుకోవాలి.
దీనిని వేరే ప్లేటులో పెట్టుకోవాలి .
ఉల్లిపాయలు సన్నని ముక్కలుగా తరుగు కోవాలి .
పచ్చి మిరపకాయలు కూడా చిన్న ముక్కలుగా తరుగు కోవాలి .
ఇప్పుడు స్టౌ మీద బాండీ పెట్టి మూడు స్పూన్లు నూనెను వేసి , నూనె బాగా కాగగానే వరుసగా ఎండుమిర్చి ముక్కలు , మినపప్పు , జీలకర్ర , ఆవాలు , ఇంగువ , పచ్చిమిర్చి ముక్కలు మరియు కరివేపాకు వేసుకుని పోపు వేగగానే అందులో తరిగిన ఉల్లిపాయ ముక్కలు కూడా వేసి మూత పెట్టి పది నిముషాలు పాటు ఉల్లిపాయ ముక్కలు బంగారు రంగులోకి వచ్చే వరకు మగ్గ నివ్వాలి .
ఒక గిన్నెలో సిద్ధంగా ఉంచుకున్న చింతపండు రసము వేసుకుని , అందులో పావు స్పూను పసుపు , తగినంత ఉప్పు వేసుకోవాలి .
తర్వాత కాల్చి పై తొక్క తీసిన వంకాయలు కూడా అందులో వేసి చేతితో బాగా కలిసేలా పిసకాలి .
తర్వాత వేయించిన పోపు మరియు సన్నగా తరిగిన కొత్తిమీర కూడా వేసుకుని గరిటతో బాగా కలుపుకోవాలి .
అంతే . రోటీలు , చపాతీలు మరియు భోజనము లోకి ఎంతో రుచిగా ఉండే వంకాయ పచ్చి పులుసు సర్వింగ్ కు సిద్ధం.
కొంతమంది ఉల్లి పాయలు వేయించకుండా పచ్చివే కలుపుతారు .
ఇష్టమైన వారు అర స్పూను పంచదార కాని అర స్పూను బెల్లపు పొడి కాని వేసుకోవచ్చు .
నరసాపురము లో మా అత్తగారు దీనిలో ఒక బంగాళాదుంప కుంపటి మీద కాల్చి , తర్వాత పై తొక్కను తీసి , కాలిన దుంపను చేతితో నలిపి ఈ పులుసు పచ్చడిలో కలిపేవారు. చాలా రుచిగా ఉండేది.
మీకు ఇష్టమైతే ఈ సారి మీరు ఈ పులుసు పచ్చడి చేసేటప్పుడు ఆ విధముగా చేసి చూడండి.
Comments
Post a Comment