చింతపండు పులిహోర తయారీ విధానం

చింతపండు పులిహోర.

కావలసినవి .

చింతపండు   --  50  గ్రాములు  గింజలను  తీసుకుని గ్లాసున్నర  వేడినీటిలో  పదిహేను నిముషములు  నానబెట్టుకోవాలి . 

తదుపరి  వేరే గిన్నెలో  చిక్కగా  రసం తీసుకోవాలి .

పచ్చిమిర్చి   --  పది . తొడిమలు తీసుకుని  ఉంచుకోవాలి .

కరివేపాకు   --  ఎనిమిది   రెమ్మలు .

బియ్యము   --  ఒకటిన్నర   గ్లాసుడు .

పసుపు  -   ముప్పావు స్పూను.

నూనె  -  మూడు  స్పూన్లు .

పోపుకు .

ఎండుమిరపకాయలు   --  పది

పచ్చి శనగపప్పు   --  మూడు స్పూన్లు 

మినపప్పు   --  రెండు  స్పూన్లు 

ఆవాలు  --  స్పూను 

పల్లీలు  ---  అయిదు స్పూన్లు 

జీడిపప్పు  -  పన్నెండు 

ఇంగువ  --  పావు  స్పూను .

నూనె  ---  50  గ్రాములు. 

తయారీ  విధానము .

ముందుగా ఒక  గిన్నెలో  గ్లాసున్నర  బియ్యము  ఒకసారి కడిగి , అందులో  సరిపడా  నీళ్ళు పోసి  స్టౌ  మీద  పెట్టుకొని పొడి  పొడిగా   వండుకోవాలి  .

అన్నం  ఉడుకుతుండగానే  మరో స్టౌ  మీద  బాండి  పెట్టి  ఓ 50 గ్రాముల  నూనె  వేసి  , నూనె  బాగా  కాగగానే   వరుసగా ఎండుమిరపకాయలు , పచ్చి  శనగపప్పు , మినపప్పు , ఆవాలు , ఇంగువ, పచ్చిమిరపకాయలు , కరివేపాకు , వేరుశనగ గుళ్ళు మరియు జీడిపప్పు వేసి  పోపు బాగా వేయించుకోవాలి.

పోపు  వేగుతున్నప్పుడే  అందులో   సిద్ధంగా  ఉంచుకున్న   చింతపండు రసము , కరివేపాకు , తగినంత  ఉప్పు మరియు పావు స్పూను   పసుపు వేసి , రసమును   బాగా  ఉడకనివ్వాలి .

తర్వాత  బేసిన్  లో  ఉడికిన  అన్నం  , అర స్పూను  పసుపు , కరివేపాకు , మూడు స్పూన్లు  కాచని   నూనె , కొద్దిగా   ఉప్పు  మరియు  ముందుగా  సిద్ధం  చేసుకున్న  పోపు లో ఉడికిన చింతపండు  రసము  అన్నములో   వేసి  గరిటతో అన్నం  అంతా   పొడి  పొడిగా   కలుపు కోవాలి .

అంతే  చింతపండుతో ఇంగువ  సువాసనలతో  నోరూరించే  పులిహోర  మీకు  సర్వింగ్ కు  సిద్ధం .

ఇందులో నువ్వుల పొడి కూడా వేసుకొనవచ్చును .

నువ్వుపప్పు  పొడి  తయారీ విధానము .

***************************

అర కప్పు నువ్వు పప్పు ,  నూనె వేయకుండా బాండీలో వేయించి , తర్వాత  మిక్సీ లో మెత్తని  పొడిగా  చేసుకోవాలి.  ఈ  పొడిని   చింతపండు  రసము  పులిహోర లో వేయగానే ,  ఈ పొడి కూడా అందులో  వేసుకుని , చేతితో బాగా కలుపుకుని  పులిహోరను  చేసుకొనవచ్చును  .

నువ్వుల పొడికి బదులుగా పులిహోరలో ఆవ   పెట్టుకున్నా  చాలా రుచిగా  ఉంటుంది.

పులిహోర లో  ఆవ పెట్టుకునే విధానము .

***************************

రెండు పచ్చిమిరపకాయలు , రెండు ఎండుమిరపకాయలు , స్పూను  ఆవాలు , కొద్దిగా  ఉప్పు మరియు కొద్దిగా  పసుపు  రోటిలో  వేసుకుని మెత్తగా  నూరుకుని , అందులో కొద్దిగా  నీళ్ళు పోసుకుని  , మెత్తగా  పచ్చడి బండతో  నూరుకోవాలి. మిక్సీ లో కూడా  ఇదే విధముగా  చేసుకొనవచ్చును .

పులిహోర చేయడము  మొత్తము పూర్తవ్వగానే , నూరిన ఆవ ముద్దను  పులిహోర పై వేసుకుని , ఆవ ముద్దపై రెండు స్పూన్లు  కాచని నూనె వేసుకుని ఆవ బాగా కలుపుకోవాలి . చేతితో  పులిహోర అంతా  ఆవ పట్టే  విధముగా  బాగా కలుపుకోవాలి.

నువ్వుల పొడి కాని , ఆవ కాని  ఏదో  ఒకటి  మాత్రమే  పులిహోరలో వేసుకోవాలి. రెండూ ఒకేసారి  వేసుకుంటే బాగుండవు.  ఈ రెండూ  వేయకుండా మామూలుగా చింతపండు  రసముతో పులిహోర చేసుకొనవచ్చును .  

అంతే.  చింతపండు తో  పులిహోర  సర్వింగ్ కు సిద్ధం.