తియ్య గుమ్మడితో కూర
తియ్య గుమ్మడితో కూర .
మంచి గుమ్మడి ( తియ్య గుమ్మడి ) ఎలా వండినా తీపి తగుల్తుంది .
గుమ్మడి కాయలో అర ముక్క తీసుకుని పై చెక్కు తీసి కాస్త పెద్ద ముక్కలుగా తరుగుకోండి .
అర కప్పు కందిపప్పు కాస్త బద్దలుగా ఉడక పెట్టుకోండి .
స్టౌ మీద బాండి పెట్టి నాలుగు స్పూన్లు నూనె వేసి నాలుగు ఎండుమిర్చి ముక్కలుగా చేసి , స్పూను మినపప్పు , పావు స్పూను జీలకర్ర , అర స్పూను ఆవాలు , కొద్దిగా ఇంగువ , రెండు రెమ్మలు కరివేపాకు , నాలుగు పచ్చిమిర్చి తరిగిన ముక్కలు వేసి పోపు వేగగానే మంచి గుమ్మడి ముక్కలు , ఉడికించిన కందిపప్పు , తగినంత ఉప్పు , స్పూను కారం వేసి మగ్గగానే దింపుకోండి .
కొంతమంది పచ్చి శనగపప్పు ఉడకపెట్టుకుని గుమ్మడి కాయ ముక్కలు మరియు ఉడికిన పచ్చి శనగపప్పు పోపులో వేసుకుని ఉప్పు కారం పప్పు కూర చేసుకుంటారు .
కొంతమంది కూరలో కొద్దిగా చింతపండు రసము మరియు కొద్దిగా బెల్లం వేసుకుని కూర చేసుకుంటారు .
గుమ్మడికాయ ముక్కలు పోపులో వేయగానే మగ్గి పోతాయి. విడిగా ఉడక పెట్టనవసరం లేదు.
Comments
Post a Comment